biznisvesti.mk портал
Претседателот на Хрватска Зоран Милановиќ ја коментираше ситуацијата со мигрантската криза на границата меѓу Хрватска и Босна и Херцеговина и рече дека проблемите се предизвикани, пред сè, од нефункционалноста на властите во Босна и Херцеговина.
Кога станува збор за проблемите со мигрантите кои се протегаат од Словенија се до Босна и Херцеговина, Милановиќ рече дека неговиот став по ова прашање е добро познат.
„Поминаа осум години од најголемиот мигрантски бран. Мојот став тогаш им беше познат на сите и би го повторил, но нема да се навраќам на тоа сега.
Во меѓувреме почна да се злоупотребува и проблемот е како Босна и Херцеговина го спроведува тоа. На Словенија нема што да и се забележи. Нашата полиција прави што може и повеќе од тоа не смее.
Ја чува државната граница. Нема Европа без граници“, рече Милановиќ, пренесува Кликс. Потоа се осврна на ситуацијата во Босна и Херцеговина во контекст на контролата на миграцијата.
– Босна и Херцеговина е проблем бидејќи не функционира. Единствениот начин да се реши е БиХ што поскоро да се интегрира во Европската Унија. Се третира како колонија и пациент на апарати.
Не и даваат да дише. Ајде да се обидеме подлабоко да ја интегрираме во нашиот систем.
Тоа е важно за Хрватска бидејќи Босна и Херцеговина е во „стомакот“ на Хрватска, а не е Хрватска, истакнува Милановиќ. На крајот, Милановиќ го спореди моменталниот статус на БиХ со Украина.
– Ако Украина може да биде кандидат, БиХ веќе требаше да биде во Европската Унија. Има многу Хрвати кои живеат таму. Целата земја нема повеќе од 2. 600. 000 луѓе.
ЕУ не може да го свари тоа и да ја вклучи во својот систем? Да видите како би се смениле работите и ќе има помалку мигранти. Тоа е сосема можно – Босна и Херцеговина во ЕУ за една година.
Кого тоа би загрозило?, заклучи Милановиќ. ссм/фото: архива .
Извор: МИА