biznisvesti.mk портал
Публиката во салата на Центарот за култура Крива Паланка синоќа уживаше во комичните реплики и хуморот на младата актерка Надица Петрова од Театарот „Златен Елец“, која настапи со стендап комедија.
-Пријатно освежување на културната понуда во нашиот град благодарение на Министерството за култура на Северна Македонија и иницијативата на министерството „Театрите поблиску до публиката“.
Смеа, хумор и бројни аплаузи се она што ја карактеризира синоќешната атмосфера, со која само ја навестувме и најавуваме богатата лепеза програмски активности на НУЦК од годишната програма, од повеќе дејности, кои придонесуваат кон програмата на манифестацијата „Крива Паланка – Град на културата“, информира директорот на НУ Центар за култура Крива Паланка Антони Стојановски.
Априлската програма беше отворена во средата, на 3 април, со работилницата „Пробуди ја креативноста“, проект од годишната програма за работа на НУЦК со менторката Оливера Станковска.
До понеделник трае пријавувањето на сите заинтересирани млади од градот за изучување традиционални инструменти: тапан, кавал, гајда и тамбура, работилници што ќе ги води професорот Горанчо Ангелов од Музичката академија при Универзитетот „Гоце Делчев“ од Штип.
В понеделник, 8 април, со почеток во 20 часот, закажан е концертот „Под сонцето“ во чест на Светскиот ден на Ромите.
На концертот ќе настапат група „Бајса и пријателите“: Бајса Арифовска, Дамир Имери, Ратко Даутовски и вокал Душко Георгиевски.
Од НУЦК информираат дека во април е предвидено да реализираат повеќе од десет настани од различни дејности за сите генерации љубители на уметноста.
ид/мд/Фото: Фејсбук на Надица Петрова и НУ Центар за култура Крива Паланка .
Извор: МИА