Примопредавање опрема за противпожарните единици во Пелагониски плански регион на Битола

Министерот за локална самоуправа Ристо Пенов денеска ќе присуствува на примопредавање на опрема за противпожарните единици во Пелагониски плански регион на Битола што ќе се одржи пред Противпожарна станица Битола.

Како што информираат од Министерството за локална самоуправа, настанот е во рамки на проектот „Прекугранично спречување и менаџирање со поплави и шумски пожари – SOLVE”.

 -Овој настан ја истакнува нашата непоколеблива посветеност на подобрување на животот на оние кои ја преземаат тешката и витална одговорност да служат во противпожарните единици.

Обезбедувањето на соодветна опрема е од суштинско значење за заштита на нивната благосостојба, зголемување на нивната ефикасност и обезбедување успех во борбата против предизвиците што ги носат пожарите, информираат од Министерството за локална самоуправа.

Како дел од овој проект, обезбедена е целосна заштитна опрема за вработените во противпожарните единици во Битола, Прилеп, Ресен, Крушево и Демир Хисар.

Овој проект е кофинансиран од Буџетот на Министерството за локална самоуправа, максимално искористувајќи ги средствата од ИПА инструментот на Европската Унија.

Министерството, во партнерство со Центарот за развој на Пелагониски плански регион, беше клучен за успешното планирање и спроведување на оваа иницијатива.

-Посветени сме на продолжување на нашата финансиска поддршка за проекти кои ја подобруваат безбедноста и благосостојбата на нашите граѓани.

Со реинвестирање на владините средства во подобрување на нашето општество, го отвораме патот за развој и на општините и на државата, велат од Министерството за локална самоуправа.

мт/дма/ Фото:МИА архива .

Извор: МИА