Општинската организација на Црвениот крст Велес ги врачи признанија за најдобрите волонтери во 2023 година.
Претседателката на ООЦК Велес д-р Кевица Клифова им се заблагодари на сите волонтери кои се вклучиле во активностите на организацијата.
Оваа хуманитарна организација во Велес и поширокиот велешки регион во 2023 година имала 103 активности, а во нив биле вклучени 2. 245 волонтери.
На синоќешната свеченост во Општина Велес, која беше по повод 5 Декември – Светскиот ден на волонтерството беа врачени признанија.
За долгогодишна успешна соработка со хуманата организација признанија добија и велешките новинари, меѓу кои и дописникот на МИА, Антоанела Гајдова Димитриевска.
Беше доделено и нововостановеното признание „Ангел Ќиров“ за најмногу волонтерски часови. За резлизирани 207 волонтерски часови во 2023 година признанието го доби 19-годишниот Никола Мацис.
Во изјавата за МИА Мацис истакна дека волонтерството во ООЦК Велес му е со цел да им помага на луѓето и да биде хуман млад човек.
Им порача и на сите млади и возрасни да бидат хумани и да им помагаат на сите на кои им е неопходна помош .
За волонтери со најдолг континуиран волонтерски стаж признанија добија д-р Филип Тодоровски, трауматолог, сега во пензија за над 40-годишен стаж во хуманата организација и д-р Владо Хаџи Наумов исто така за над 40-годишен стаж во хуманата организација и долгодишен началник на Брза помош во Велес, а сега во пензија.
Тодоровски истакна дека е среќен што го добива ова признание од хуманата организација во која членува уште од своето вработување во ЈЗУ Општа болница Велес и до ден денес.
Тој иако веќе е во пензија, сепак се вклучува во активностите и помага во бројни едукативни предавања, како и во подготовските за давање на Прва помош на кандидатите за возачи и на учениците за натпреварите по Прва помош.
-Секогаш сум на на помош на Црвениот крст, секогаш кога треба да се држат едукатувни предавања за било која медицинска тема. Сум ги посетил сите училишта во Велес и сите во поширокиоот велешки регион.
Најчесто сум се задржувал на едукативните предавања за борбата против ракот и бев прв во земјава кој воведе систематски прегледи за борба против ракот на дојката, информира д-р Тодоровски.
Како трауматолог потенцира дека не е важно само да се даде прва помош при разни несреќи туку правилно да се укаже прва помош бидејќи од правилно укажаната прва помош значи и да се спаси нечиј живот во опасност, додека на местото на настанот да дојде медицинската екипа од Прва помош.
Признанија добија и учениците од ССОУ „Димитрија Чуповски“ познато како Хемиско училиште од Велес, кои беа првопласирани на државниот натпревар по Прва помош на кој годинава домаќин беше ООЦК Велес.
ад/мд/Фото: МИА и Општинска организација на Црвениот крст Велес .
Извор: МИА