Јавното обвинителство доби поддршка од Република Франција

Соработката во областа на меѓународната правна помош, материјалните и кадровските ресурси на Јавното обвинителство и измените на Кривичниот законик беа во фокусот на средбата на Јавниот обвинител на Република Северна Македонија, Љупчо Коцевски, со амбасадорот на Република Франција во земјава, Сирил Бомгартнер, и со француската судијка за врски – генерален инспектор за правда за Југоисточна Европа со седиште во Белград, Фредерик Дубос.

Како што соопштуваат од Јавното обвинителство, на средбата биле разменети информации за процесот на дигитализација на Јавното обвинителство, како и за претстојните реформи во рамките Поглавјата 23 и 24 од преговорите со Европската унија.

– Амбасадорот Бомгартнер и судијката Дубос понудија поддршка за Јавното обвинителство во рамките на проектите кои Република Франција ги отвора во регионот и кои ќе бидат достапни и за македонските правосудни институции.

Дополнително, во областа на меѓународната правна помош, беа разгледани можностите за организација на специфични практични обуки за македонските јавни обвинители при изготвувањето на барањата за меѓународна правна помош и нивно усогласување со стандардите на земјите-членки на ЕУ, стои во соопштението од ЈО.

Дополнуваат дека претходно судијката за врски, Дубос, и аташето за внатрешна безбедност од Амбасадата на Република Франција во Скопје, Жан-Пол Диспан, оствариле средба со претседателот на Здружението на јавните обвинители, Елвин Вели.

ар/са/Фото: ЈОРСМ .

Извор: МИА