biznisvesti.mk портал
Израелско беспилотно летало е соборено над Либан во текот на ноќта, соопштија рано утринава израелските одбранбени сили (ИДФ), пренесе ДПА.
Врз дронот, што оперирал во либанскиот воздушен простор, бил лансиран проектил земја-воздух, напиша ИДФ на каналот Телеграм.
Дронот бил погоден и слетал во Либан, соопшти ИДФ, додавајќи дека израелски борбени авиони потоа го погодиле местото од каде биле лансирани ракетите.
Либанската милитантна група Хезболах потврди дека соборила израелско воено беспилотно летало над јужен Либан и додаде дека станува збор за дронот „Хермес 450“.
Тоа е трет израелски дрон соборен од Хезболах од почетокот на војната во Појасот Газа, кога започнаа и прекуграничните напади меѓу Израел и Хезболах.
Вчера избувнаа борби со Либан, а израелската армија објави дека две гранати биле истрелани во правец на селото Рош Ханикра во северниот дел на Израел на Средоземното Море.
И Хезболах и палестинската милитантна организација Хамас ја презедоа одговорноста за вчерашните напади врз Израел, додаде ДПА. сд/фото:Википедија .
Извор: МИА