Британија се вклучува во потрагата по заложниците во Газа

– Велика Британија соопшти дека ќе почне со надзорни летови над Израел и Појасот Газа во потрага по заложници кои ги држи Хамас.

Британското Министерство за одбрана соопшти дека авионите за надзор „ќе бидат невооружени, нема да имаат борбена улога и ќе имаат единствена задача да ги лоцираат заложниците“, пренесува Скај Њуз.

– Само информациите поврзани со спасување на заложниците ќе бидат проследени до властите одговорни за спасување на заложниците, се вели во соопштението на министерството и се додава дека летовите ќе се вршат над источниот Медитеран, вклучително и оние во воздушниот простор над Израел и Газа.

Министерството за одбрана соопшти дека владата на Велика Британија „работи со партнери од целиот регион за ослободување на заложниците, вклучително и британски државјани, кои беа киднапирани“ во нападот на Хамас на 7 октомври.

„Безбедноста на британските граѓани е наш највисок приоритет“, се вели во соопштението на британското Министерство за одбрана.

Британската војска распореди свои сили во источниот Медитеран една недела по нападот на 7 октомври, кога авиони на РАФ и бродови на Кралската морнарица беа испратени во регионот. јт/ .

Извор: МИА