biznisvesti.mk портал
– Европската комисија ги намали за 0,3 процентни поени прогнозите за економски раст за еврозоната во 2023 и 2024 година на 0,8 отсто и 1,3 отсто, соодветно, најмногу поради тешкотиите во Германија и нејзината индустрија.
Се очекува 20-те земји кои го користат еврото годинава да забележат раст од 0,8 отсто наместо прогнозата од 1,1 отсто во извештајот во мај, соопшти Европската комисија.
За следната година очекувањата се намалени на 1,3 отсто од 1,6 отсто. Инфлацијата продолжува да забавува.
Според соопштението објавено денеска, Брисел сега смета на просечен раст на потрошувачките цени од 5,6 отсто во 2023 година, што е за 0,2 поени помалку во однос на последната прогноза во мај и раст од 2,9 отсто во 2024 година, односно 0,1 отсто повеќе од предвиденото во мај.
– Слабоста на домашната побарувачка, особено потрошувачката, покажува дека високите потрошувачки цени, кои продолжуваат да растат за повеќето стоки и услуги, вршат поголем притисок од очекуваното, се наведува во соопштението на Комисијата.
Европскиот комесар за економија Паоло Џентилони на прес-конференција рече дека „се очекува дополнително слабеење во наредните месеци“ кога економијата ќе се соочи со повеќе предизвици.
Клучен извор на слабост во европската економија е Германија, чија економија е погодена од повисоките цени на енергијата и слабата побарувачка во Кина, важен трговски партнер.
Комисијата предвидува дека германската економија годинава ќе забележи пад од 0,4 отсто.
Според Меѓународниот монетарен фонд, Германија е единствената голема економија која се очекува да забележи пад оваа година, и предвидува пад од 0,3 отсто. јт/Фото: МИА архива .
Извор: МИА