Богоев: Дијалог и спроведување мерки за олеснување на трговијата, клучно за забрзан раст на економијата

Дијалогот со македонските компании и спроведувањето на мерките за олеснување на трговијата е клучно за забрзан раст на економијата, истакна директорот на Царинската управа Стефан Богоев при посетата на македонската компанија ИГМ Трејд во Кавадарци.

– ИГМ Трејд е еден од најголемите домашни инвеститори во државата со вкупни инвестиции на ниво на групација во 2023 година од 15 милиони евра и извоз од 120 милиони евра.

Оваа компанија е пример како со визија може да се прерасне во светски гигант кој е препознатлив и на меѓународниот пазар.

Континуираниот дијалог со македонските компании е во насока на креирање ефективни политики и мерки со коишто ги подобруваме услугите, а со тоа и условите за водење бизнис.

Ова е клучно за остварување забрзан раст на економијата, што придонесува за повеќе работни места и подобрување на животниот стандард, нагласи Богоев.

Тој потенцира дека за Царинската управа, како институција која е партнер на македонските компании, е од голема важност спроведувањето на реформските политики и имплементацијата на мерките коишто за компаниите ќе значат олеснување на трговијата, а преку имплементацијата на системите се придонесува за отстранување на бирократските процедури и побрзо издавање на потребните одобренија за увоз и извоз.

– Во моментов преземаме активности за имплементација на Национален едношалтерски систем, кој подразбира имплементација на еден цел реформски процес во кој се вклучени 16 институции се со цел да се овозможи олеснување и забрзување на трговијата како клучно за подобрување на условите за водење бизнис и забрзана интеграција во единствениот пазар на ЕУ.

Паралелно работиме и на унапредување на останатите системи и нивно усогласување со системите што се користат во ЕУ, вели Богоев.

Тој ја посочи компанијата ИГМ трејд како безбеден и сигурен партнер на Царината, која користи одобрение за овластен економски оператор, што овозможува побрзи и поевтини прекугранични постапки, одобрение за одобрен извозник што им овозможува извоз за пократок временски рок, за поедноставени постапки за локално царинење при увоз и извоз.

– Освен тоа, компанијата поседува и одобренија за поедноставени постапки за овластен примач и овластен испраќач што им овозможува поедноставено спроведување на транзитни постапки, истакнуваат од Царинската управа.

ир/саФото: Царинска управа   .

Извор: МИА