Врнежите ги раздивижија одроните на патиштата во Пијанечко-Малешевскиот регион

Обилните дождови кои во текот на вчерашниот ден го зафатија Пијанечко-Малешевскиот регион, утрово повторно создадоа проблеми со одроните на регионалните патишта. На магистралата А3 и патниот правец Делчево – М. Каменица – Кочани, одрони утрово се забележани на излезот на Делчево после селото Очипала како и во близина на селото Илиово, додека одрони има и на одредени делници на регионалниот пат Берово – Струмица.

Надлежните од подружницата на „Македонија Пат“ информираат дека нивни екипи ја скенирале состојбата и работат на нивно расчистување. Оттаму воедно апелираат на почитување на сообраќајната сигнализација и намалување на брзината особено на места со кривини.

– Појавата од одрони е честа на овие делници во услови на врнежи, но и покрај тоа нашите дежурни екипи се на терен и навремено интервенираат во нивно отстранување, информираа од Македонија Пат.

Поради врнежливото време сообраќајот на магистралата А3 во текот на ноќта и утрово на места се одвиваше по влажни коловози. вс/ир

Фото: МИА