Донација од Комерцијална банка вредна 6 милиони денари за изградба на градинка „Верверичка“ во Кисела Вода

Комерцијална банка продолжува со својот придонес за општественото добро со донирање 6 милиони денари за изградба на градинка „Верверичка“, со што на жителите на оваа општина ќе им обезбеди дополнителен современ и удобен простор за згрижување на нивните деца.

Со свечено поставување на камен темелникот денеска започна изградбата на новата градинка, која ќе биде осмиот објект во рамките на градинката „Весели Цветови“.
Новата градинка „Верверичка“ се очекува летово да ги прими првите дечиња, кои благодарејќи на донацијата од Комерцијална банка и од Општина Кисела Вода ќе добијат нов модерен простор за нивните игри, дружби и први едукативни часови.

Со оваа донација Комерцијална банка ја продолжува својата општествено одговорна мисија за помагање и создавање подобро општество за сите. Грижата за здраво и весело детство ја препознаваме како приоритет на секое општество и затоа Комерцијална банка со повеќе свои донации и проекти досега придонесе за подобри услови за образование, лекување и грижа за децата.

„Огромно е задоволството кога новата година ја започнуваме со нова благородна мисија, со која ќе обезбедиме модерна градинка за дечињата од Кисела Вода. Комерцијална банка е особено горда на секој свој придонес кој значи подобра грижа, поздрав раст и повесели денови за секое дете. Затоа дониравме за реновирање на Детската клиника за кардиологија и ревматологија. Затоа помагаме за опремување сензорни соби во училиштата. Го поттикнуваме инклузивното општество во кое сите треба да имаме еднакви можности. А, донацијата за изградба на градинка во Кисела Вода дефинитивно ни го стопли срцето во овие студени денови затоа што значи уште едно весело катче исполнето со детска смеа и дружба“, изјави на свеченоста д-р Маја Стевкова Штериева, Главен финансов директор и член на Управниот одбор на Комерцијална банка.

Градоначалникот на Кисела Вода, Орце Ѓорѓиевски, и в.д. директорката на ЈДГ „Весели цветови“, Мануелка Ивановска, изразија голема благодарност до Комерцијална банка за донацијата.

„Во новата градинка најмногу место ќе има за најмалите дечиња кои чекаат да бидат запишани во јасли, што за мене како градоначалник е убава вест бидејќи е сигурен знак дека нашата општина расте. Децата се нашиот највреден ресурс и инвестирањето во нив е најзначајниот влог што можеме да го направиме. Убаво е да се има сојузници во оваа значајна мисија и затоа сакам да се заблагодарам на Комерцијална банка АД Скопје, со која заеднички преку финансиско партнерство го градиме овој нов објект. За реализација на овој проект Општина Кисела Вода обезбеди 8 милиони денари, а Комерцијална банка учествува со значајни 6 милиони денари“, изјави Ѓорѓиевски.

В.Д. директорката Ивановска истакна дека градинката „Весели Цветови“ успешно работи во делот на воспитно-образовната и згрижувачка дејност со 1.200 деца од предучилишна возраст.
„Со новиот објект „Верверичка“ добиваме 6 нови занимални за над 110 дечиња, што значи унапредување на можностите за нашите најмлади, за нашата иднина. Уште еднаш благодарам за помошта, соработката и поддршката што ја имаме од Општина Кисела Вода, како и на Комерцијална банка АД Скопје, која како дел од својата корпоративна општествена одговорност ги препозна благородните цели и се вклучи во реализацијата на овој проект“, изјави Ивановска.

Комерцијална банка како истакнат лидер во доменот на корпоративната општествена одговорност со секоја своја донација активно придонесува за постигнување повисоки општествени цели и благосостојба, а во истовреме создава и вредности за новите генерации, како и примери кои треба да инспирираат и да поставуваат уште поголеми цели