Пентагон става крај на соработката со Харвард

Министерот за одбрана на САД, Пит Хегсет, објави дека неговото министерство става крај на професионалното воено образование, стипендиите и програмите за сертификати со Универзитетот Харвард, што претставува последната во низата ескалации од страна на администрацијата на Трамп кон оваа институција.

Администрацијата на претседателот Доналд Трамп презема низа мерки против врвни американски универзитети, вклучувајќи го и Харвард, поради повеќе спорни прашања. Меѓу нив се пропалестинските протести против воената операција на Израел во Газа, програми за различност, политики поврзани со трансродовите лица и иницијативи за климата.

„Од овој момент, и во текот на академската 2026-27 година, ги прекинувам сите постдипломски програми за професионално воено образование (PME), стипендии и сертификати помеѓу Универзитетот Харвард и Министерството за војна за активен воен персонал“, напиша Хегсет на платформата „Х“. Хегсет, инаку, самиот е магистер по јавни политики од Харвардската школа Кенеди.

Новата регулатива ќе се применува на воениот кадар што ќе се запишува во идните програми, додека оние што веќе се запишани ќе имаат можност да ги завршат своите студии.

Тој, исто така, најави дека Пентагон во наредните недели ќе ги преиспита сличните договори и со други универзитети.

Заговорниците за човекови права изразија вознемиреност во врска со прашањата за слободата на говорот, академската слобода и правичното судење, како последица на владините дејства насочени кон универзитетот.

Претходно, Универзитетот Харвард тужеше против администрацијата на Трамп поради обидот на владата да ги замрзне федералните фондови.

Хегсет го обвини Харвард за „антиамерикански активизам“ и го окарактеризира како антисемитски во контекст на пропалестинските протести.

Демонстрантите, вклучувајќи и некои еврејски групи, посочуваат дека владата погрешно ги поистоветува критиките кон израелската акција во Газа и окупацијата на палестинските територии со антисемитизам, а застапувањето на палестинските права со поддршка на екстремизмот.

Универзитетот Харвард ја осуди дискриминацијата во рамките на кампусот. Неговите работни групи за антисемитизам и исламофобија минатата година утврдија дека Евреите и муслиманите се соочуваат со нетрпеливост по почетокот на израелската војна во Газа, по нападот на Хамас во октомври 2023 година.

Обидите на Трамп да ги блокира федералните финансиски средства за Харвард наидоа на правен отпор, а досега не беше постигнат договор меѓу двете страни.

Трамп овој недела изјави дека неговата администрација бара милијарда долари од Харвард за да се расчистат сите нејаснотии околу политиките на факултетот.

Некои од универзитетите од групата „Ајви Лига“ постигнаа договори со администрацијата на Трамп и ги прифатија одредени владини барања. Универзитетот Колумбија се согласи да исплати над 220 милиони долари на владата, додека Универзитетот Браун се обврза да плати 50 милиони долари за поддршка на развојот на локалната работна сила.