Јапонија протестираше до Русија поради ограничувањата за премин на бродови кај спорните острови

Јапонија испрати официјален протест до Русија поради нејзината одлука привремено да го забрани минувањето на странски воени и државни пловила во водите околу островите кои се под руска власт, а за кои Јапонија полага право.

Овие острови, Јапонија ги именува како Северни територии, додека Русија ги нарекува Јужни Курилски Острови.

Конфликтот околу овие острови е присутен од крајот на Втората светска војна и досега ги оневозможува двете држави да потпишат мировен договор.

“Поднесовме протестна нота преку дипломатски канали бидејќи оваа одлука не е во согласност со нашиот став за северните територии и е неприфатлива за нас”, изјави секретарот на јапонскиот кабинет Јошимаса Хајаши на прес-конференција.

Според неговите зборови, Русија известила дека од среда до 1 мај нема да дозволи странски воени и владини бродови да патуваат во водите околу спорните острови.

Правото на „невин премин“ низ територијалните води, загарантирано со Конвенцијата на Обединетите нации за поморското право, им овозможува на странските бродови да минуваат низ водите на друга држава, освен ако не претставуваат опасност за безбедноста.

Јапонија смета дека островите Итуруп, Кунашир, Шикотан и групата острови Хабомаи биле „илегално окупирани од Советскиот Сојуз“ веднаш по предавањето на Јапонија на 15 август 1945 година, додека Русија инсистира дека тоа било легитимно.