ЕЦБ размислува за преглед на стратегијата за монетарна политика

Европската централна банка (ЕЦБ) разгледува промена на својот пристап, врз основа на кој ја спроведува својата финансиска политика, со цел да може побрзо и поприлагодливо да одговори на потенцијални нарушувања во цените, објави Ројтерс, цитирајќи публикација на Блумберг.

Раководниот одбор на ЕЦБ детално ќе дискутира за евентуална ревизија на својата стратегија за првпат за време на неформална средба која ќе се одржи на 6 и 7 мај во португалскиот град Порто.

Блумберг се повикува на неименувани официјални лица, информирани за подготовките за средбата. Според нив, на состанокот ќе бидат разгледани и оценети извештаите на двете работни групи формирани за проценка на стратегијата за монетарната политика на ЕЦБ.

Ќе се дискутира и за анализа на оваа тема подготвена од Комитетот за монетарна политика, во кој учествуваат водечки економисти од ЕЦБ и претставници на централните банки на земјите од еврозоната.