Божиновска: Новиот закон за енергетика ќе донесе многу придобивки

Новиот закон за енергетика, кој го помина првото читање во Парламентот, е документ кој ќе го дефинира енергетскиот сектор на Македонија во идните декади, истакна денес министерката за енергетика, рударство и минерални суровини, Сања Божиновска.

“Не добивме забелешки за новиот закон за енергетика, но ќе има многу придобивки од законот кој требаше да биде донесен кон крајот на 2023 година.”

Божиновска потенцираше дека се работело посветено на овој закон, кој содржи 317 члена. “Напорно работевме и го направивме овој закон кој има 317 члена.”

Според неа, со овој закон ќе се креираат енергетски заедници преку кои граѓаните ќе можат да инсталираат соларни панели и да управуваат со своите сметки за електрична енергија. “Со него ќе се формираат енергетски заедници преку кои граѓаните ќе можат да ставаат соларни панели и да се грижат за своите сметки за струја,” изјави Божиновска по денешната средба со новинарите во Министерството за енергетика, рударство и минерални суровини.

Таа подвлече дека со ова законско решение, за првпат ќе се воспостави методологија за да се утврди реалниот број на лица кои се соочуваат со енергетска сиромаштија во државата. Исто така, МЕПСО ќе премине во сопственост на Министерството за енергетика, рударство и минерални суровини, а за првпат ќе се формализира постоењето на батерии за складирање на електрична енергија произведена од обновливи извори. Дополнително, ќе има одредба за е-мобилност, односно за полнење на електричните автомобили по прифатлива цена.

“Веќе почнавме да работиме на методологијата за утврдување на енергетската сиромаштија заедно со Министерството за социјална политика и со неа ќе можеме да ја знаеме точната бројка.”

Божиновска додаде: “Неофицијално во земјава има околу 50,000 броила кои се сметаат за енергетска сиромаштија, но сакаме да имаме точна бројка. Формирана е работна група и систематски работиме на детектирање на сите што се засегнати од енергетската сиромаштија и сме при крај. Ќе има неколку модели кои се уште не сме ги финализирале, но државата секако ќе им помогне.”

Во одговор на прашање, таа изјави дека според неофицијални податоци, голем дел од енергетската сиромаштија влегува во четвртиот блок за потрошувачка на електрична енергија, особено во Битола. “Сето ова ќе го провериме и ќе имаме точни и прецизни бројки,” потенцираше Божиновска.

Со законските измени, во рок од седум години ЕВН ќе треба да ги замени постоечките броила со смарт броила за да се избегне доцнењето во читањето на сметките, за што одлука ќе донесе Владата по усвојувањето на законот. “Владата ќе направи се што е во интерес на граѓаните. Се уште не сме дискутирале како ќе биде тоа, но ќе направиме се за граѓаните да немаат никакви трошоци,” објасни Божиновска.

Таа потенцираше дека ја наследиле тешка состојба во енергетскиот сектор и додаде дека во 2017 година производната цена на АД ЕСМ била 37 евра за мегават час електрична енергија, а лани во јуни била 135 евра. “Тоа е енормно зголемување. Менаџментот на АД ЕСМ работи на намалување на производната цена. Ништо не може да направиме преку ноќ, бидејќи не е нешто за што има краткорочно решение.”

“Имаме подобрување во хидрологијата со оптимизација и паметно работење на службите во ЕСМ и сега е над 34 проценти. Ќе следат и ремонти, бидејќи не беа завршени на време. Три месеци е многу краток период за да видиме некои резултати, но до крајот на годинава очекувам дека ќе се направи консолидација на ЕСМ. Се надевам дека државата ќе направи се за граѓаните да немаат никакви ценовни шокови на следниот тендер, кој ќе биде на почетокот на втората половина од годинава,” заклучи Божиновска.

вј/aa/Фото: МЕРМС .