Азиските берзи во пораст по најавата на Трамп за корекција на царините за увоз на возила

Денес, цените на акциите на азиските берзи се зголемија, бидејќи инвеститорите беа охрабрени од изјавата на американскиот претседател Доналд Трамп дека е можно да ги прилагоди давачките за увоз на возила.

Регионалниот индекс на акции MSCI во Азија-Пацификот забележа пораст од 0,4 проценти во 7 часот, со што го засили позитивниот тренд втор ден по ред.

Утринава, јапонскиот индекс Никеи се покачи за 1,1 процент, додека цените на акциите во Хонг Конг, Австралија и Јужна Кореја пораснаа помеѓу 0,2 и 1 процент. За разлика од нив, во Шангај, забележан е мал пад.

Меѓу главните корисници утрово беа акциите на производителите на автомобили, бидејќи Трамп вчера изјави дека може да ги ревидира царините од 25 проценти за увоз на автомобили и автоделови од Канада, Мексико и други делови на светот.

Пазарите исто така добиваат поддршка од вчерашниот раст на берзанските индекси на Волстрит, откако Трамп привремено ги исклучи паметните телефони, компјутерите и некои други технолошки производи од царините за увоз од Кина.

Индексот Доу Џоунс порасна за 0,78 проценти, додека Си&П 500 забележа пораст од 0,79 проценти, а индексот Насдак се зголеми за 0,64 проценти. Сепак, неизвесноста во врска со тарифите ги одржува инвеститорите внимателни.

Особено што царинската војна меѓу САД и Кина продолжува, што ќе има негативно влијание врз двете економии. Прашањето е само до кој степен. “Периодот на несигурност продолжува. Во ова опкружување, потрошувачите, извршните директори и инвеститорите тешко можат да планираат долгорочно”, вели Џед Елербрук, портфолио менаџер во Argent Capital Advisors.

На валутните пазари, вредноста на доларот во однос на група валути благо опадна. Индексот на доларот, кој ја мери вредноста на американскиот долар во однос на шесте главни светски валути, утринава се движи околу 99,65 поени, додека вчера во истиот период изнесуваше 99,70 поени.

Девизниот курс на американската валута во споредба со јапонската валута се зголеми од вчерашните 143,00 на 143,05 јени.

Американската валута исто така зајакна во однос на европската, што доведе до намалување на цената на еврото на 1,1355 долари, додека вчера во ова време беше 1,1375 долари. Од друга страна, цените на нафтата покажаа мал пораст.

Цената на барел на лондонскиот пазар утринава се зголеми за 0,31 проценти, достигнувајќи 65,10 долари, додека на американскиот пазар цената на барел порасна за 0,39 проценти, на 61,75 долари.